Aeneas quibus in mediis sic deinde locutus:
303
“Accipite haec animis, laetasque advertite mentes:
304
nemo ex hoc numero mihi non donatus abibit.
305
Gnosia bina dabo levato lucida ferro
306
spicula caelatamque argento ferre bipennem;
307
omnibus hic erit unus honos. Tres praemia primi
308
accipient flavaque caput nectentur oliva.
309
Primus equum phaleris insignem victor habeto;
310
alter Amazoniam pharetram plenamque sagittis
311
Threiciis, lato quam circum amplectitur auro
312
balteus et tereti subnectit fibula gemma;
313
tertius Argolica hac galea contentus abito.”
314